返過大陸見到上面嘅發展之後,你就會對中國改觀

係,喺仲係個中一仔,北京奧運之後嘅嗰一年,我去咗大陸「交流」。當然對我嚟講唔係正式嘅交流啦,因爲個活動本身係 St. Paul (嗰陣太細個,大鄉里嘅我唔知道係聖保羅書院、聖保羅男女中學、聖保祿中學定係聖保祿學校,不過我印象中係有男有女)同獅子會某個分會一齊搞嘅交流團,去唔知鄭州定係洛陽嘅一間孤兒院度同佢哋驗眼。至於點解我呢個讀元朗「雞地名校」嘅中一仔都咁榮幸可以跟埋去呢?古語有云:「識人好過識字」,獅子會嘅嗰個分會嘅前會長,其實就係我嘅姑姐,所以我好輕易咁就做咗隨團嘅嘉賓 (?)。 有啲情景,雖然係九年前發生,但係仲記得好清楚。 一去到間孤兒院嗰陣,真係會有班人喺門口叫「歡迎歡迎,熱烈歡迎(普通話)」,有冇 fik 旗就唔記得咗,但係個門口就好明顯係有精心佈置過,掛咗一啲歡迎 banner 咁,嗰一刻真係有啲覺得自己變咗國家領導人咁款。 細個嘅我仲好天真咁以爲,唔知我係咪都要幫啲人驗眼,但係好快之後就發現,呢個係間名校嘅義工交流團,同我其實冇乜關係,難聽啲講,就係行就行先,企就企兩邊。去到之後就見到 St. Paul 嘅一衆學生揮灑佢哋嘅汗水(冇冷氣),好熱血咁幫孤兒院嘅咁多位孤兒驗眼。而我就企喺登記處附近望住咁多位名校仔女揮灑汗水。咁個登記處其實係要幫啲要去驗眼嘅孤兒登記嘅,咁就會睇到曬佢哋啲資料啦。我問有跟埋一齊去嘅姑媽,「呢個(党)係咩字嚟?」佢答我應該係黨字,簡體字嚟咖嘛。「咦,不過點解佢哋全部都姓黨?」我姑媽問。哦~,因爲佢哋無父無母,唔知姓乜,所以就改佢哋姓黨 lo,原來除咗媒體要姓黨,孤兒都係姓黨。

返過大陸見到上面嘅發展之後,你就會對中國改觀
返過大陸見到上面嘅發展之後,你就會對中國改觀