閏月幾時有？

通常小學生都會知道新曆／西曆每 4 年會有一次閏年（有閏日嘅年份），喺 2 月會多咗一個 2 月 29 號嘅閏日。雖然未必知道喺年份係 100 嘅倍數而唔係 400 嘅倍數嘅時候唔使置閏（例如：1800、1900、2100、2200 ……）但係至少都知道呢幾十年大約邊年會多咗日。

而農曆嘅閏月就會比較少人知係點定，咁事實上除咗農曆新年嗰排，平時都冇咩人會用農曆㗎啦。只係，如果嗰年有閏月嘅話，下個農曆新年就要等 13 個月！

咁因爲農曆嘅一個月係真係跟住月亮咁濟，所以一個月係得 29–30 日。爲咗要跟得返一年嘅季節，咁就要置閏嘞。而農曆而家嘅置閏就大約係十九年七閏，每 19 年就會大約有 7 個閏月。

而嗰個閏月加落邊到呢？就要睇嗰個農曆月嘅節氣。
1. 如果一個農曆月冇「中氣」，咁嗰個月就係閏 X 月，X 就跟返前一個月係第幾個月。
2. 如果一年*入面有多過一個農曆月冇中氣，咁閏月就置喺最前面冇中氣嗰個月。
3. 冬至呢日係一定要喺十一月，如果閏完月會搞到冬至唔係喺十一月嘅話，就唔置閏。

*不過喺呢度，一年係由十一月（冬月：有冬至嘅月份）至下一個十月咁計

大家都應該知道，一年有 24 個節氣啦。不過，喺呢度佢將啲節氣分咗做兩類，12 個大「節氣」同 12 個「中氣」。簡單嚟講就係第一個節氣（立春）係大節氣，下一個（雨水）係中氣，再下一個（驚蟄）係大節氣，梅花間竹咁數落去。

舉個例啦，例如 2017 年，下面紅圈就係中氣，可以見到閏六月入面係冇中氣嘅。

2017 (丁酉―肖雞)年公曆與農曆日期對照表 （香港天文台）
https://www.hko.gov.hk/gts/time/calendar/pdf/2017.pdf

又例如 2033 年，喺七月之後嗰個月係冇中氣嘅，但係如果將下個月叫做閏七月嘅話，冬至就會變咗喺十月三十，違反咗「冬至一定要喺十一月」嘅規定，所以就冇閏到。然後喺下一年*（由十一月起計嘅一年），喺十一月嘅下一個月又係冇中氣喎，而因爲已經算係下一年，所以呢個月就叫做閏十一月嘞。

有啲人以爲閏月規則淨係得上面嘅 1 同 2，就搞到以爲呢年係閏七月，因爲佢哋忽略咗 3. 冬至一定要喺十一月。

2033年問題
https://zh.wikipedia.org/wiki/2033%E5%B9%B4%E5%95%8F%E9%A1%8C

至於點解要定到咁麻煩呢？其實應該都同西曆點解年份係 100 嘅倍數而唔係 400 嘅倍數嘅時候就唔使置閏嘅道理差唔多，都係爲咗個曆法更加準。詳細嘅原因可以睇下下面篇喺論壇度搵返嚟嘅文。

當然，咁有冇其他準啲或者冇咁煩嘅方法呢？咁只可以講呢個方法其實已經夠準夠唔煩，有興趣探討落去亦都可以睇下下面篇文啦。

常識篇二：曆法簡明介紹（li0627，2009）
http://www.21cma.net/thread-2935-1-1.html

總之，上面篇文嘅重點係，咁樣置閏之後，拉勻每 213 年就會誤差一日，至少好過冇吖。佢又有探討，如果 334 年 123 閏就會每 24203 年先會誤差一日，仲勁過西曆咁話。